Plattdeutsches Interview mit Nele Ohlsen „Plattdüütsche School“ sleit Wellen

Nele Ohlsen, Lehrerin an der Kirsten-Boie-Schule in Wallhöfen, und vier ihrer Kolleginnen werden am Sonnabend mit dem Heinrich-Schmidt-Barrien-Preis ausgezeichnet. Wir sprachen mit ihr - natürlich op Platt.
28.02.2019, 18:04
Lesedauer: 3 Min
Zur Merkliste
Von Ulrike Schumacher

Fro Ohlsen, warum meent Se, dat dat een goode Saak is, wenn Kinner Plattdüütsch köönt?

Nele Ohlsen: Dat givt mehrere Aspekte. Plattdüütsch is wat ganz Wertvollet, dat an uutstarven is. Ik nehm dat Bispill vun min Oma. As se in de School kamen is, dar har dat heeten: Du musst Hochdüütsch snacken. Se kann aver nur Platt. För ehr is dat so schrecklich ween, dat se ehr Kinner keen Platt mehr lehrt hett. Dorbi is Plattdüütsch een Stück von us Kultur. Dat kummt överall in vör: in de Namens, in de Stratennamens, in de Ortsnamens. Un denn is Plattdüütsch ok een goode Chance för Mehrspraakigkeit. Plattdüütsch is een Brugg to mehrere Spraaken. To dat Inglische as Bispill. De Kinner, de Plattdüütsch köönt, hebbt een grooden Vördeel. Dat wiest sik ok bi‘n plattdüütschen Lesewettstriet. Belegt is: Wenn een op Platt lesen lernt, denn verbeetert sik dat Hochdüütsche Lesen.

Wo sünd Se sülben to de plattdüütsche Spraak kamen?

Ik bin keen Plattdüütsche von Hus uut. Ik bin mit Platt opwussen, aver ik heff dat nich snackt. Min Grootollern hebbt ünnernanner Platt snackt, so harr ik dat jümmer im Ohr. Un ik bin ok mit tein, olben Jahr to de plattdüütschen Theaterspeeler in us Ort gahn un heff dor mitholpen, wenn Opführung wör. Later heff ik sülbs mitspeelt. Aver ik heff den Text jümmer uutwennig lernt. Anners güng dat nich. Un denn heff ik 2010 min Referendariat in Celle makt un eenes Dags heet dat: Dor givt dat een Fortbillung för Plattdüütsch un ik heff mitmakt. Dor heet dat plötzlich: Du musst snacken – un ik heff mi een trechstammelt. Un nah dree Dag kummt een Ostfreesin un meent to mi: Du büst ok woll Mudderspraaklerin. Un ik sä: Nee! Mittlerwielen kann ik dat fließend un ok fließend schrieven. Över de Fortbillung heff ik de Steer in Wallhöfen bekamen. Bit darto hett dat dor blots een plattdüütschen Lesewettstriet geben. Ik heff dat Plattdüütsche an de School nah un nah opboot.

Denn is dat op Se ehrn Mist wussen, dat de Grundschool Wallhöfen dat Prädikat „Plattdüütsche Grundschool“ drägen draff?

Ja, dat is op min Mist wussen. Dat Billungsministerium hett dat fördert, un so sünd wi Projektschool worden. Aver ik heff seggt: Dat langt us nich. Wi wüllt, dat alle Kinner an de School Platt snackt. Un nu makt wi dat in‘n Sportünnerricht, un min Morgenkries mak ik ok op Platt. Darto kummt för de Kinner in jede Klass een Stünn Plattdüütschünnerricht in de Week, un ik heff en egen Lehrwark för den Plattdüütschünnerricht entwickelt, dat dat Ministerium rutgeven hett: Plattsnack.

Wat hebbt de Kinner denn darto seggt, dat se Platt snacken mööt?

Annersrüm: Wat seggt de, de keen Platt hebbt?

Wat makt Se, dat de Jungs un Deerns Lust op Platt hebbt?

De Kinner möögt den Klang von de Spraak geern.Un se sünd ganz vernarrt in Okke. Dat is een Handpuppen-Uhl, de mit jem Platt snackt. De is een beten frech un wuschelt de Kinner ok mal dör dat Haar.

Blievt de Schööler an Plattdüütsch dran, wenn ehre Grundschooltied vörbi is?

Dat is dat Problem: Dat givt noch nich so veel Sek-Een-Schoolen, de Plattdüütsch makt.

Wecke plattdüütschen Früchte hett de „Plattdüütsche School“ Wallhöfen all bracht?

Dat geiht ok nah buten ruut. Ik heff den Kinnergarn mit in‘n Boot. Un ik bün Beratersche för de Landesschoolbehörde. Dat heet, dat ik to de Schoolen föhr un se berat, wo dat mit Plattdüütsch gahn kunn. As Obfro för den Landschaftsverband Stade mak ik ok de Organisatschon för den Plattdüütschen Lesewettstriet. Un de Stadtbibliothek Osterholt hett ok anfragt, is also an Plattdüütsch interesseert. Dat givt uuterdem Kontakte to‘n Landkries. Een kann seggen: De „Plattdüütsche School“ sleit Wellen.

Nu kriggt Se un ehre Schoolmester-Kolleginnen den Heinrich-Schmidt-Barrien-Pries för all ehre Arbeit. Wat hebbt Se dacht, as dat ruutkööm?

Ik heff mi total ehrt föhlt.

Un wo kriggt de holten Kopp von Herrn Schmidt-Barrien nu för een Jahr sien Platz?

Dat hebbt wi noch gar nich besnackt. Wo de Büste toerst landet un wo dat dann wietergeiht, mööt wi noch utklamüstern.

Mit Nele Ohlsen snack hett Ulrike Schumacher.

Info

Zur Person

Nele Ohlsen (33)

is siet acht Jahren Plattdüütsch-Schoolmestersche an de Kirsten Boie-Grundschool in Wallhöfen, de de Uutteeknung „Plattdüütsche School“ drägen deiht. Tohop mit de veer Schoolmesterschen Heike Brüning, Heike Hiestermann, Andrea Schwarz un Henrike Stindt ward Nele Ohlsen düssen Sünnabend, 2. März, Klock 11 Uhr in de St.-Jürgenskark de Heinrich-Schmidt-Barrien-Pries verleehen. Eenmal in Jahr ward Minschen or Institutionen ehrt, die sik för dat Lebennighalen vun de plattdüütsche Spraak insett.

Jetzt sichern: Wir schenken Ihnen 1 Monat WK+!
Mehr zum Thema
Lesermeinungen

Das könnte Sie auch interessieren

Einwilligung und Werberichtlinie

Ich erkläre mich damit einverstanden, dass die von mir angegebenen Daten dazu genutzt werden, regelmäßig per E-Mail redaktionelle Inhalte des WESER-KURIER seitens der Chefredaktion zu erhalten. Die Daten werden nicht an Dritte weitergegeben. Ich kann diese Einwilligung jederzeit formlos mit Wirkung für die Zukunft widerrufen, z.B. per E-Mail an widerruf@weser-kurier.de.
Weitere Informationen nach Art. 13 finden Sie unter https://www.weser-kurier.de/datenschutz

Schließen

Das Beste mit WK+